陳豪及陳茵媺（Aimee）首次以「夫妻檔」合拍新劇，九年未有拍劇Aimee除了要應付大量動作戲及將頭髮剷青外，更要紮胸以男裝上陣，她說：「真係抖唔到氣！」
無綫台慶劇《羅密歐與祝英台》自去年九月開鏡後一直備受矚目，除因陳豪及陳茵媺相隔11年再於同劇同框，亦是Aimee闊別視壇九年後的回歸之作。為打響復出頭炮，監製陳維冠為Aimee度身訂造極有記憶點角色，除要一人分飾性格截然不同的孿生兄妹外，更要史無前例應付大量開槍及動作場面。
陳茵媺呢個髮型放番落嚟之後，相對女性化同溫柔得多。
直言「真係似男人」
為迎接前所未有新挑戰，Aimee早於劇集開拍前一年已秘密練兵，學習跆拳道練習踢腿及增強柔軟度之餘，更落力操gym鍛鍊體能，加上為期三個月的專業動作特訓，認真度100分。
陳茵媺為了是次復出做足準備，更早於開劇前一年已學定跆拳道打好個底，十分專業。
Aimee的角色造型亦是花盡心思，據知單是髮型已花了不少時間及心機，皆因為配合動作場口，相關髮型在不能借助假髮的前提下，要做到同時適合切換為男裝及女裝，難度頗高。在種種限制及考量下，監製於開劇前一、兩天落實以剷青解決問題，紮起來是男裝、放下來是女兒身。Aimee笑指當得悉要剷青後不無擔心，幸好最終效果有型又自然：「個造型好出，望住鏡入面嘅自己，都覺得真係似男人。」
呢個髮型紮起咗就係男裝，放番落嚟就係女兒身，設計相當有心思。（陳茵媺 IG 圖片 ）
減十磅為更上鏡
自認完美主義的Aimee，為令角色更有說服力，除減肥十磅讓自己更上鏡，又應監製要求刻意壓低聲線及紮胸女扮男裝上陣：「紮咗胸真係抖唔到氣，加埋我好多動作場口，個能量消耗好大。」
陳茵媺為咗呢個男裝角色，應監製要求紮胸上陣。
久未拍劇的Aimee，透露復工初期壓力爆煲：「都有成十年（實為九年）冇拍劇，好多嘢要真正埋番位再熟絡番要一段時間，壓力好大。我記得第一日已經拍咗十幾場，之後連續四、五日都係十場十場咁拍，好似發緊夢咁，啲燈照住自己時，連講對白都好緊張，我未試過咁緊張嘅。我記得第一日最尾二嗰場仲要喊，我心諗Oh My God，我九年冇拍戲，但第一日就有喊戲…嗰時我瞓又瞓唔到、食又食唔到，好似失戀咁。」談到與老公陳豪首度以情侶兼夫妻檔上陣便要拍攝親熱戲，Aimee甜笑表示十分尷尬：「我擔心咗好耐，因為平時錫唔會有咁多人睇住，係有啲緊張。」
陳茵媺與陳豪夫妻檔為無綫拍攝宣傳片，席間談到以真夫妻身份拍攝親熱戲時，陳茵媺忍唔住係咁尷尬傻笑，相當可愛。
至於陳豪飾演的角色亦別具特色，雖然實際上是一名神槍手，但表面望落市井又狡猾，別號「萬事通」的他一人包辦神父、包租公、裝修工人及通渠佬等多重身份，但卻周身刀冇張利，陳豪受訪時亦坦言角色很搞笑：「呢個角色其實充滿人情味，佢係一個有義氣嘅醒目江湖仔，槍法好勁，但整體又好似好渣咁，總之就好複雜估你唔到啦。」
陳豪嘅角色表面上卻係市井之徒，實際上係一個神槍手，仲要經常估你唔到。
此外，陳豪將要離港三個月，到深圳拍攝新劇《企業強人》，Aimee於社交網站上載一家嘆美食的天倫樂照片，她以英文留言說：「陳豪將離開香港拍攝直到今年年底。 我們想念你啦！三個月感覺好漫長啊！」
一家五口嘆美食。（陳茵媺 IG 圖片） 陳茵媺同細女Camilla。（陳茵媺 IG 圖片）
