無綫台慶劇《叠影狙擊》昨晚（6日）首播，首集內容已相當豐富，集齊打戲、槍戰、喊戲三大搶焦元素之餘，更別具懸疑感，首集更是女主角周秀娜Solo晒冷作，先後迎戰職業殺手及神秘狙擊手的她，無論是凌空起飛腳或是槍戰場口均表現俐落，當中更不乏埋身肉搏及槍戰戲。
網民讚成功轉型
除了動作場口，Chrissie還要一口氣應付三場喊戲，分別是發現妹妹屍體、與上司爭辯應否查案，及在方力申面前憶述對亡妹的悔疚，獲網民肯定演技的同時，更被指是實力派：「娜姐啲喊戲幾掂喎」、「成功轉型實力派」。至於娜姐的動作場口，亦同樣獲點讚：「第一集好緊張，娜姐好靚又打得！」
Chrissie受訪時笑指首集打鬥場面未算最難，關鍵原因竟然是高踭鞋，娜姐說：「第一集因為我仲未正式扮梁曦，唔使着高踭鞋拍打戲，所以順利啲！」
談到首集有多個落淚場口，她透露最深印象是與方力申在家中的喊戲：「劇情講我知道妹妹走咗好內疚，嗰場戲係幾大壓力，因為要好集中去諗同妹妹嘅回憶片段去幫助培養情緒，所以嗰幾場戲（喊戲）我都生人勿近，唔會同身邊啲人講笑，而嗰日係拍得最攰同最痛！」
「深度拉筋」面露痛苦
同劇的盧慧敏（Amy）、蔡浩然（Scott）和張凱娸（娸娸）首次演出電視劇集，並要應付大量動作場面，開拍前按劇組要求，他們接受一連串特別訓練。身為動作片初哥，要睇得又打得，必須下「苦」功，學習做打星之前，一切從拉筋開始。
舞蹈員出身的Scott，本應是筋骨最柔軟的一個，但眼見他被導師按在地上進行「深度拉筋」，Scott不斷露出痛苦表情，可想而知Amy與娸娸情況更加慘不忍睹。Scott說：「我跳開舞都覺得好辛苦，原來打架俾我想像中複雜好多，所以我完全明白身邊兩位嘅感受，我上完堂返屋企要休息一整日，再用熱水浴腳，條腰勁痛，但我知道娸娸上完堂之後，就連落樓梯都有困難。」
在旁的娸娸面露尷尬笑容說：「因為我平時係冇做開運動，上完堂之後，我係坐低、起身、行樓梯，都會發出痛苦嘅聲音，但其實係好事，學多樣嘢，做演員需要好好裝備自己。」
盧慧敏練腿肌獲鼓勵
至於Amy，劇中將首度嘗試飾演奸角，一雙長腿更是她的最強武器，Amy解釋：「劇入面我經常要用隻腳去同人打，主要集中訓練雙腿，但原來踢腿用嘅肌肉，同我平日做運動運用嘅肌肉係唔同，真係要練，有排搞，其中一位師傅好好，不斷鼓勵我話：『冇嘢難到你㗎！你要做第二個楊紫瓊㗎！』，於是我就會忍住痛同自己講：『冇嘢難到我㗎！冇嘢難到我㗎！』」Scott也相當認同：「師傅唔會話『乜你咁渣㗎！』，佢哋會不斷同你講：『你做到㗎嘛！你唔係要做武打巨星咩？你要做甄子丹！』雖然聽落好搞笑，但對我哋嚟講，係一個好正面嘅鼓勵。」
