無綫藝人文頌男（Koba）自揭在椎間近盤骨附近位置確診肉瘤後，全面停工休息及接受治療。他昨日再出PO分享新病況，指經歷五次化療後，醫生宣佈治療無效，腫瘤未有縮小反而變大，坦言又近死亡一步：「我好唔想離開你哋！」
文頌男在去年底公開他身患罕見的惡性尤文氏肉瘤，消息震驚許多粉絲和觀眾，至目前仍正接受治療，惟面對龐大醫藥費，他一度公開尋求援助。在與病魔的鬥爭中，他透過社交網IG一直分享抗癌經歷。儘管化療過程艱難，他仍然堅強地面對，並開始他的網上直播生涯，以此與網友互動及分享經歷，訴說心聲，也希望能借此陪伴他渡過休養日子。
不幸地，報告最近顯示化療非未達預期效果，病況反有惡化跡象，對他而言無疑是沉重打擊。他昨日在社交平台上分享照片，並寫下心路歷程，直播過程中見到他身形明顯更消瘦，面色稍顯憔悴，頭髮剃光。他引述醫生指，已做過五次化療仍未見療效，反而「腫瘤還要增大了一點」，建議他放棄化療，「準備做電療啦」。消息讓他感到十分失落，但他仍然堅強地面對，並表示他將繼續與病魔抗爭下去。他謂當刻心情「好似跌咗落深淵」。他坦言真係好驚，「感覺距離死亡又近咗一步」，並感慨說：「我好唔想離開你哋。」
文頌男社交平台全文：
經歷咗第一階段嘅治療，做咗五次嘅化療，但係治療無效。照咗磁力共振，發現個腫瘤唔單止冇縮細，仲變大咗少少。喺呢個時間點，我想分享少少自己嘅真實想法同感受。
做咗五次化療，每一次都好似經歷生死，肉體上好難受好辛苦，而且所有毛髮都甩晒，個樣好似妖怪咁，到後期仲開始痛返。我真係覺得好無奈，好似咁辛苦但係完全冇意義。另一方面，到真正聽到醫生話：「個治療冇乜效果、個腫瘤仲要大咗少少，最後一次化療都唔好做喇，準備做電療啦。」嘅時候，我心情喺嗰刻好似跌咗落深淵。同時，我真係好驚，感覺距離死亡又近咗一步，而且可能唔係死咁簡單，係會死得好痛苦，因為我嘅下肢 、盤骨附近嘅位置係越嚟越痛，痛到開始連嗎啡都冇辦法舒緩到，身體仲會不自覺抽搐，有啲身體部位已經變得麻木，排泄方面都開始出現好多問題（呢部分太羞恥都唔想講太多），我開始有種感覺係「我活得好冇尊嚴」，因為行動不便、痛，每日都係喺屋企對住四埲牆，幾乎零社交、零工作，每日都活得好似好無意義咁。我成日都好驚，我真係好驚，好驚，好驚可能臨死前會半身不遂、全身插滿喉管、無時無刻都伴隨住巨大嘅痛楚、意識唔清醒又表達唔到自己。
捱咗咁耐、咁辛苦、無一刻可以放鬆，有時唔知為咗乜嘢。我咁大個人，都未活得輕鬆過。由細到大都遇到唔同難關同挑戰，就算每次嘅挑戰都越嚟越困難，但我都靠自己一一跨越過，但個天就好似好想我死咁，唔肯放過我，唔想畀我輕鬆。喺我以為終於生活可以穩定啲嘅時候，又畀咗呢一個難關我，而今次我覺得我真係控制唔到，冇辦法靠自己去解決。就算我想放棄，但其實根本唔知可以點放棄。我未死嘅話，我只能夠選擇堅持。依家我每日都痛、非常痛，無一刻唔痛，每日度日如年，我唔知幾時可以開始電療、幾時先可以舒緩到我嘅痛楚，我只係盼望可以快啲唔痛。
我諗好多癌症病人即使表現得有幾堅強、幾樂觀都好，都會有我以上類似嘅諗法。但會咁樣諗唔代表我放棄，我仍然好努力對抗呢個病，即使幾唔想食嘢，都逼自己食；即使幾痛都好，都逼自己要郁吓，唔好畀啲肌肉退化得咁勁。呢段時間雖然我喊好多，但喺可以笑嘅時候，我放聲笑；想講咩嘅時候，盡情去講，唔會再收收埋埋，因為有啲嘢，依家唔做，以後唔知仲有冇機會做，唔諗咁多未來，活在當下，享受依家仲有嘅嘢。
我仍然好熱愛我嘅拍攝、演出工作。好希望有一日可以康復、行動自如，可以繼續返呢啲工作。亦都好想繼續可以留喺我愛嘅人身邊、我嘅朋友、家人。我多謝我嘅家人、朋友、我最愛嘅好兄弟、老闆、同事同喺網絡上唔認識但默默打氣嘅所有人，你哋一直支持我、照顧我、體諒我。我愛你哋，我好唔想離開你哋。
麥惠琪哭成淚人
Koba早前參與拍攝治療前最後一次主持清談節目《不正常愛情研究所》今晚（28日）播出，兩位主持麥惠琪（Susuca）及黃紫恩（Jojo）分別為患病的Koba送上祝福，Susuca講到對Koba的印象時表示︰「初初識你嗰個月開廠就傾偈，知你又拍拖又分手。有日見到你腰痛不停問你咩事，後來你公布患病消息，咁細個就要經歷咁多嘢，加油快啲好返，做你想做嘅事。」接住她在節目中哭成淚人，反過來要Koba安慰。
