無綫節目《中年好聲音2》今午公布入圍名單， 人數由原定的100人增至108人，其中102名參賽者出席記者會，當中不少人是專業人士，亦有曾在幕前演的歌手藝人，包括2003年港姐季軍戚黛黛、劉威煌、黃劍文、姚安娜等。而鄧兆尊弟弟鄧兆榮及孫耀威妹妹孫美賢亦成功入圍，但許志安的哥哥許志偉及杜德偉胞兄杜德智則108強止步。
除了節目主持車婉婉率領第一季得獎者分享比賽錦囊外，大會宣布天后歌手陳慧嫻將會加盟第二輯節目，擔任專業評審。她在台上以自身經驗鼓勵參賽者，又教他們如何克服上台恐懼：「當今次可能係我企喺台上最後一次唱歌，一定要enjoy（享受）個台，希望將感染力傳遞畀觀眾，爭取機會表達得最好。希望喺呢個過程突破自己可以有進步，希望唱到最後大家攞住嗰咪唔肯放。」她其後受訪時指節目正能量又勵志，鼓勵大家去追夢的訊息。至於還有甚麼夢想去追，她表示想愈唱愈強。去年加盟英皇唱片的她，問到會否再舉行演唱會，她透露公司籌正備緊演出，暫時未能透露。
現年41歲的戚黛黛接受訪問時指今屆參賽者很勁，坦言對能入圍108強已經很開心，又指自己很喜歡唱歌：「我唔係專業，希望可以有多啲機會喺台上唱到自己鍾意嘅歌，同埋希望自己有進步。台上唱歌係自己，希望可以跳出自己嘅comfort zone（舒適區），挑戰自己想做嘅嘢。（家人支持你？）佢哋都有支持，老公話如果我唔參加一定會後悔。」
戚黛黛又表示參加海選後收到不少朋友大讚她勇敢，提到海選時更被評判伍仲衡批評說話有懶音，問到情況可有改善，她謂練歌時都會盡量減少懶音：「但都好難，因為我加拿大返嚟，識講中文但唔識寫。上次都係我嗰『國』字有懶音，所以時真係會混淆咗。希望呢個比賽有進步，所以會努力。」她指比賽初期會揀選識唱的慢歌，但倘能晉級，或會挑戰自己，嘗試唱快歌或不同曲風的歌曲。
孫耀威胞妹孫美賢報稱於瑞士巴素爾任職企業併購，她透露自小已喜歡唱歌：「依家過咗40歲人到中年有咁嘅機會，所以決定返嚟。」她指哥哥同家人都非常支持她參賽，故會認真做到最好。問到可會唱哥哥的作品，她謂：「希望有機會啦！（教你演繹歌曲？）都未，因為佢比較忙。希望晉級可以再唱佢啲歌。（佢有冇畀意見你？）叫我要兼顧好所有嘢，因為都有小朋友，又有份工。（點分配時間？）一有時間就會練歌，其他時間就做好媽咪本份，照顧好小朋友，希望每一樣都可以兼顧。」提到參賽需要留港一段時間，她表示已與老闆交代，工作項目亦通常都是在亞太區，所以個人身處香港比較方便。
