薛影儀（阿儀）近日公開指摘其經理人林寶玉（Connie）後，其所屬公司亞洲心動娛樂發聲明宣布無限期暫停阿儀的工作。對於聲明中指阿儀擅自盜取公司IG帳號，Connie為自家品牌活動揭幕時回應，稱不認會阿儀有登入密碼。至於何時會可以「解凍」阿儀，公司主席賴彩雲稱要看她的言行態度。
「亞洲心動娛樂」（AMM）經理人林寶玉，今午出席自家美容院第二分店開幕，獲公司主席賴彩雲及一眾亞姐到場支持。Connie表示今次擴張營業時是一個小進步：「之前美容院係做美容同減肥療程，今次加入咗身心靈療程，做到內外平衡。（投資咗幾多錢？）我今次有個櫃放我啲特色名牌手袋，加埋都有幾百（萬）。」至於會否再開分店，她謂如果生意能上手的話，半年後再開一間細舖，亦希望可以在其他地區嘗試開分店。
有「亞視一姐」之稱的薛影儀近月與AMM鬧翻，提到AMM日前在聲明中，指阿儀「擅自盜取公（司）設立社交平台IG帳號，私自發自己和公司無關活動的照片」，但黃榕指阿儀已解釋自己沒有盜用公司IG帳號，而是與公司合用。阿儀其後亦於社交平台指帳號是由公司為她開設。Connie反駁說：「呢個IG係我哋公司建立，基本上佢冇任何密碼各樣嘢，我哋都了解緊點解我哋公司資料會外洩咗，我哋公司依家失去我哋平台。」至於被阿儀公開指罵，Connie指今日是新店開幕，希望講開心事。
「解凍」睇阿儀態度
對於阿儀現被「雪藏」，問到何時會可以「解凍」，亞洲心動娛樂主席賴彩雲表示：「其實呢個係一個流程嚟，都想畀佢意識到佢要多多注意（個人行為）。如果我哋再打造佢嘅話，佢嘅言行舉止好重要，希望佢有少少警惕，雪藏幾耐就睇佢態度。其實佢有主動聯絡，同高層溝通。高層叫佢刪帖文，佢都有做。（佢有改善緊？）係，希望佢意識到。」
有指AMM早為阿儀安排於新片擔任女主角，賴彩雲坦言：「我哋的而且確準備咗啲嘢畀佢。（阿儀停工令公司有損失？）唔會，因為未開拍。但我哋已經有咗概念、劇本，做埋主題曲。」至於是否不希望阿儀再與黃榕等人交往，她說：「我哋冇講過黃榕唔好，我哋都唔會阻止佢交朋友。但唔知佢係咪有意或冇意將件事放大，好似寶玉都有自己嘅生意。公司用好自由方式畀佢哋一個機會，所以交朋友娛樂唔係問題。」在旁的林寶玉指只是要求阿儀工作時工作，遊戲時遊戲。
