無綫年度選美盛事《2023香港小姐競選》決賽今晚於將軍澳電視城隆重舉行，大熱的15號莊子璇整晚表現亮麗，最終打破試戴后冠的魔咒，勇奪冠軍。而4號王怡然及17號王敏慈分別獲得亞軍季軍。王怡然亦同時奪得「最上鏡小姐」。
莊子璇（Hilary）由入圍開始已被視為大熱之一，雖然是非多多，但於今晚的《2023香港小姐競選》決賽上，憑着出眾的對答，成功登上港姐寶座，亦是繼向海嵐及雷莊𠒇後，第三個打破「后冠魔咒」的港姐冠軍。
Hilary受訪時直言得悉自己奪冠後感到震驚，對於成為第三位港姐打破「后冠魔咒」，她笑說：「噚日我咪話覺得成世人運氣用咗喺呢個比賽度嘅，依家可能用埋下半世啲運氣。（會點慶祝？）今晚未必有時間慶祝。可能過幾日同朋友家人出去食飯慶祝。」講到她於問答環節上口才了得又夠淡定，是否自己最滿意的部份，她說：「其實我聽問題真係好驚㗎！不過我覺得尚算OK啦。唔滿意就係我其實冇用晒啲時間，我覺得可以得詳盡少少。（之前啲是非多，依家覺得鬆一口氣？）係啦！是非同熱唔熱門都唔關事，都係喺決賽表現好自己。」她透露有興趣於幕前工作，但未來一年要先要履行港姐義務，之後才考慮於演藝方面發展。
王怡然頗滿意表現
亞軍兼「最上鏡小姐」王怡然表示感到開心和驚訝，自己的整體表現頗滿意：「因訓練咗好耐，依家東話比預計好啲，同埋笑容一直有 keep住。真係冇諗過攞獎，之前都有為自己打氣，但係冇相信會做到。（點慶祝？）會打邊爐。」問到與王敏慈一同獲亞季是否更開心，她說：「係雙重興奮，我啱啱同佢講，因為之前我哋廣東話都唔係好標準。（廣東話唔好會唔會擔心認受性？）其實自己都好驚訝好多香港網友私訊我支持鼓勵我，我都好開心。」至於可會入娛樂圈發展，正修讀傳媒管理的她謂會先完成最後一年學業：「因為學歴都好重要，一定會讀完。」
而季軍王敏慈得悉獲獎一刻心情既緊張又開心，想食火鍋慶祝：「之前要keep住身形，同埋我哋日日都有好多活動同埋訓練，所以呢段時間好攰。」問到是否滿意賽果，她說：「我覺得滿意，因為參加呢個比賽都係平常心，都有諗過可以攞獎。今日整體嚟講，我自己表現幾好，對自己都好滿意因冇咩大嘅出錯，同埋我答問題都OK，但廣東話要繼續進步吓。」她表示夢想做一位藝人，之後都希望演戲唱歌跳舞。
王敏慈奪得季軍。（蘇震揚攝）
《2023香港小姐競選》得獎名單：
冠軍：15 莊子璇
亞軍： 4 王怡然
季軍：17 王敏慈
最上鏡小姐：4 王怡然
友誼小姐：8 梁晶晶