許廷鏗（Alfred）新歌《一場同學》前日（6日）上架，MV請來疑患抑鬱停工半年的好友鄭欣宜擔任女主角，Alfred指欣宜狀態很好，拍足20小時，保持一如以往的專業及充滿正能量。他謂聖誕的個唱有邀請欣宜任嘉賓但未獲回覆，他笑說：「幫我追追佢！」
鄭欣宜（Joyce）今年先後缺席兩大音樂頒獎禮，其經理人林珊珊其後證實Joyce因病停工，有傳她疑受情緒病困擾，多月來只出現過在好友的社交平台上自彈自唱《有天我會好》。許廷鏗上月31日於社交平台上載新歌相片，相中金髮女子的背影疑似是Joyce，惹來熱議。Alfred日前出席《2023年度叱咤樂壇流行榜頒獎典禮》記者會時，直認相中人正是欣宜。
Alfred 新歌《一場同學》MV前日（6日）正式推出，連同「神隱」多月的Joyce終於現身，她今次以孖辮妹、畢業生等多個造型「復出」，身型回復圓潤，於MV時不時七情上面，不時開懷大笑，亦有含淚戲分。不少網民看大讚欣宜是最適合的MV女主角人選，紛紛表示被二人深厚感情感動。
Alfred透露好友狀況：「大家睇到佢演出都應該知道佢狀態真係好好，我地當日拍足二十個鐘，她由朝到晚都一如以往咁專業同充滿正能量，令整個拍攝團隊都好歡樂！以我所知佢已經非常ready投入工作，好快大家會見到佢。作為朋友替佢開心，希望大家熱烈歡迎佢回歸！」
早前宣布聖誕節期間於竹翠公園舉行由自家唱片公司主辦的《SANTA JAMBOREE音楽生活祭リ 許廷鏗LIVE 2023演唱會》，問到有否邀請欣宜睇騷，Alfred直言：「我何止約佢睇，我直頭邀請佢做嘉賓啦，大家都掛住舞台上嘅Joyce啊！不過佢仲未應承我，你哋見到佢都幫我追追佢！」
忙於健身減足十多磅
近日Alfred除宣傳新歌外，還為 「自導、自演」的演唱會及聖誕市集忙過不停：「呢排不停開會同籌備都真係好忙，因為成個演唱會同市集咩都關我事，甚至聖誕市集內啲檔攤，全部都係我自己親自挑選，所有都係我鍾意嘅衣食住行小店。市集每日show前都會開放，公眾免費入場，希望大家有個開心熱鬧嘅聖誕節！」
除策劃外，Alfred忙於為演唱會健身、排舞及綵排，清減不少的他透露已經減去十多磅：「outdoor show係自己一直好想挑戰嘅，需要嘅體力真係比室內場大好多，加上今次繼續有WinWin同KC幫我排舞，佢地好有energy，所以我都要嚴陣以待。」
舞台落足本唔錫荷包
體能準備之外，聲音都要開始進入狀態，所以Alfred每星期都會上唱歌堂，對於演唱會內容，他難掩興奮：「你哋都知我係鍾意每場都有唔同歌單，所以要練好多歌啊，不過今次準備好多大家耳熟能詳嘅歌，到時一齊大合唱等我偷啲時間飲啖水！（仲有冇秘密武器可以透露？）大家係要親身入嚟睇，因為淨係個台都已經超乎你所想，歌迷係好容易見到我嘅，落足本啊！自己做老闆係可以任性少少，完全無錫住自己個荷包，所以大家幫手買晒啲飛佢啦，哈哈！」