香港中學文憑試（DSE）今日（19日）放榜，圈中不少歌手藝人均為應屆考生，其中炎明熹（GiGi）雖然未有親到學校，不過她公布喜訊，自爆早已成功獲香港理工大學取錄。而身在越南的應屆候選港姐胡睿涵（Hanna）直言心情緊張，手機不離手等候成績公布。
炎明熹早前受訪時曾透露因為喜歡畫畫，故想修讀時裝設計課程，而理大是她心儀的大學。原來GiGi早已如願以償，她今晚於社交平台宣布喜訊：「我成功透過《學校推薦直接取錄計劃》，獲香港理工大學取錄，並修讀科目Scheme in Fashion。其實這消息早在六月底已獲悉，不過要在尊重及合適時間才通知大家，多謝關心！」她表示會在學業及歌唱事業繼續努力，希望外界能繼續支持，同時也很感謝母校的鼎力幫助。
身在越南拍攝外景及進行特訓的候選港姐胡睿涵（Hanna）坦言DSE放榜前一晚睡不着：「今日又有大型表演，同埋又出DSE成績，心情勁緊張。」問到如何知道DSE結果？她說：「係老師話畀我聽，佢睇咗成績就Send張相畀我。所以今日一直都睇住手機，睇吓老師幾時發訊息畀我。」問到對DSE成績滿不滿意？Hanna坦言：「其實都係我理想嘅成績，我成績一向都好穩陣，唔係極好但又唔係太差。」問到最滿意的一科？Hanna說：「視覺藝術，成績比預期高咗。」至於其後在學業上的安排，她謂：「都會繼續讀，睇吓考唔考到心儀的大學。」
黃明德成績畀預期好
英皇歌手黃明德今早返回賽馬會體藝中學領取成績單，他透露成績較預期好：「我成績係18分，best 5，全部加埋係20分，本身諗住自己係15、16分，諗住大專駁上去，但出嚟成績係over咗我嘅expectation，我係夠18分。」他表示可以報讀好多大學degree課程，所以好開心：「最surprise係我中文攞到5作文，拉到我成個中文有4，呢個係我最surprise，因為我冇諗過我語文科可以攞到4。我本身冇諗過報讀大學jupas，諗住讀asso駁上去讀歷史系，但頭先同咗好多老師傾過，就覺得其實應該放棄讀歷史系，或者第時入到大學轉科，咁就揀咗個degree讀先。」
