碧咸（David Beckham）旗下美國球隊國際邁亞密（又譯：國際邁阿密），昨日與中國香港隊踢友誼賽，惟萬眾期待的球星美斯及蘇亞雷斯均缺陣，全場齋坐，引來大批球迷噓爆大叫回水，班主碧咸為力挽狂瀾，親自繞場一周拍手掌，更大方與衝入球場的球迷合照，惜未能平息民憤。其中唯一成功突破防線埋身碧咸的球迷事後被起底，真身原來是人氣健身教練。
該名健身教練事前明顯有備而來，不但練跑增加爆發力，更帶定釘鞋、球衣等道具衝入大球場。他在Instagram出post分享「戰績」並寫道：
I did it.
行動代號「決心」
人生第一次下咁大死心，睇曬啲衝落球場嘅片，買埋落場版球衣，簽名筆，帶埋釘鞋(不過冇著)，諗曬所有會發生嘅野。
係衝之前，成個過程我一路都好驚，見到三層欄杆同埋成堆保安。我問咗我朋友好多次，我應唔應該衝。佢問我如果唔衝會唔會後悔，我話一定會後悔，人一世物一世唔想自己後悔，之後就下死心：無論如何一定要衝到落去！
最後真係比我攞到碧咸簽名，仲同我合照，佢真係好靚仔好好人，此生無憾
I did it.
I love you. @davidbeckham
多謝大家。
