歌手唐浩嘉（Kiko）上電台節目分享奇異經歷，入行前曾任職護士的Kiko有「唐姑娘」之稱，她分享多單在醫院工作時一些鮮為人知的事，自爆「半夜開工其實幾驚，我哋會擺較剪同釘書機呢類金屬利器，向住門口鎮住，用來擺陣擋煞。」
Kiko任職護士期間接觸過不少生老病死個案，她透露彌留病人身上會散發出一種特別味道，「以前做私家看護，我會喺重症病人身上聞到啲奇怪氣味，感覺到佢就嚟走，過咗兩日佢真係走咗，正常人身上係唔會聞到呢陣味。」
醫院怪事數之不盡，Kiko分享其中一單令人不寒而慄的故事，「有個病人重病走咗，幾日後有個醫院姨姨喺後樓梯見到佢坐咗喺到，姨姨問個病人『點解你喺呢到？』，佢哋對望咗一眼，姨姨見到佢眼神怪怪地，跟住佢就返去，佢返去同同事講，先知個病人已經走咗幾日。有時啲病人都唔知自己已經離開咗，老人院更甚，有啲會如常返番去自己間房，同埋會聞到佢陣味。」
另一單怪事發生在一個實習護士身上，該實習生和職員推遺體到醫院殮房，職員突然發現遺下物品要離開去拿，便着實習生留在殮房的樓層電梯口等待，惟該實習生等候良久都未見對方回來，於是欲致電尋人，但電話卻顯示沒有網絡，並且愈發感到該樓層愈來愈凍及燈光很暗，「後尾個職員返嚟，佢個電話突然恢復訊號，而且覺得整個世界都正常返，懷疑佢當時去了結界。」
經常接受傳媒訪問的醫生李家仁友人Eva亦有分享自身奇異經歷，李家仁稱自己相信靈魂，「我信呢個世界唔係淨係人嘅世界，呢個空間有好多道空間，不過係我哋感受唔到、睇唔到，所以一定有，不過無論點樣，你信或不信，只要做人做得正就唔使驚。」