《福祿壽訓練學院》真人騷成員黃建東（Derek）和趙頌宜（Maggie）接受新城訪問時，獲家燕姐大讚是扮嘢高手，更帶挈兩人返內地登台搵真銀。Derek自爆擅長浮誇，但曾被阮兆祥要求收（歛）啲。
曾於2014年與王祖藍主持《Sundy扮嘢王》的家燕姐在錄音訪問中，大讚Derek和Maggie是扮嘢高手，但她有感扮鬼扮馬不容易，「之前我哋一個騷要扮兩、三個角色，做完先知扮嘢係咁難。」
參加2011年香港先生選舉入行的Derek，對演藝事業充滿熱誠，家燕姐問他參加扮嘢比賽有甚麼難忘事？Derek表示：「參加呢類節目比較難，因為之前成日扮嘢都扮過女人同扮阿伯，仲有咩新鮮感畀大家？同埋扮聲唔係我強項，所以心理壓力好大，我擅長浮誇，但祥師兄（阮兆祥）要我收（歛）啲，收係一個難度。」
至於在選秀節目《聲夢傳奇2》中被彈台風「一碌木」的Maggie，自爆小時候已經熱愛模仿，所以參加《福祿壽訓練學院》，Maggie表示：「我細個已經好鍾意扮嘢，見到咩好笑嘅人就扮，試過扮郭晶晶。」家燕姐激讚她：「你喺節目到扮蔡琴真係好成功。」Derek亦表示：「佢綵排時好似冇信心咁，到正式時就放晒出嚟。」
Derek和Maggie因「好戲」獲家燕姐賞識，帶挈兩人返內地登台搵真銀，家燕姐透露：「我返去開會時提佢哋個名，大家即刻話好想見佢哋，咁我話返去問吓佢哋得唔得閒，今次好難得同佢哋一齊上去。」
