黃子華及潘燦良（阿燦）主演的舞台劇《最後禮物》原定年初公演，但因第五波疫情延至今年7月才正式演出。前晚完成最後一場演出後，子華於謝幕時笑言今次每場演出是可一不可再：「大家唔好見我冇乜嘢，其實我每場都驚係最後一場，唔係驚病，咩疫個啲 ，我係驚我會死，因為我演完每一場都死咗咁滯。」
潘燦良亦依依不捨話說：「我呢世可能得呢次機會同子華合作。所以好珍惜，子華我會懷念你！」他指疫情之間做騷真的非常不容易：「好榮幸，慶幸，這個騷一波多折，最終都可以上舞台同大家見面，五十個晚上，全體近百個工作人員，只有一個案例輕微感染，且發生於休息日之中，無傳染給任何一位演員及工作人員，大家順順利利健健康做晒這五十場，真是非常之不容易！」
能夠順利演完50場，子華表示要感謝台上每位出色的舞台藝術工作者，他更形容今次的班底，可以話史無前例咁厲害，每一位演出者都係獨當一面、最好的舞台劇演員，他更大讚區嘉雯 : 「我當年入香港話劇團時，幾乎每一個劇女主角都係佢，我恨不得有份同佢做戲，最後我有一次機會，係莎士比亞劇入面做佢細佬，着住對絲襪走出來，何其尷尬。所以我真係好開心，今次可以同咁多好演員合作。至於阿燦，就唔駛講啦，佢係我honey，我直頭係佢fans！」子華對每一位演員的敬重及關懷，讓現場大家也非常之感動，歐嘉雯及韋羅莎聽着子華說話，更激動得落下淚來。
眾演員演出完畢後，於後台開香檳作小慶祝，兩人之後如子華寫道「各奔前程」。阿燦忙自己執導的新劇《短暫的婚姻》，子華就會歸隊《飯氣攻心》參予謝票。目前票房已經過四千萬，子華話當然十分開心，由其戥導演及編劇高興，因為他們花了很多心血去做一個好劇本，能得觀眾鼓勵十分重要：「一班兄弟姐妹連日來不停謝票，真係辛苦曬，我會歸隊一齊㗎啦。」
講到阿燦剛話可能呢世人最後一次與他合作，子華大笑：「點會？我大把機會可以再合作啦。」有提議子華不如把《最後禮物》改編成電影搬上大銀幕，阿燦說：「都可以喎！依家其實已經有舞台劇已經試緊，係電影院到播，不過未成氣侯。我哋可以諗吓，帶起這個新的風氣。」子華也感認同：「真係可以！我哋都有錄影！可以直接係戲院播成個舞台劇，等更多人睇到個製作！反正英皇咁多院線！呢個真係一個好提議呀！」
