無綫台慶劇《下流上車族》昨晚（17日）首播，首集兩大亮點，絕對是美儀姐經典黑絲重現、郭柏妍（Rosita）及羅毓儀（Yuki）「三母女」水着嬉水。曾被網友封為「黑絲儀」的美儀姐，穿睡衣加黑絲大騷無敵長腿，Fit爆身材令人艷羨，美儀姐黑絲重現江湖，觸動網友神經，大讚美儀姐Keep得好兼有女人味。講到經典黑絲再現，美儀姐笑謂：「我都唔知點解劇組咁鍾意要我着黑絲，我話：『吓，仲嚟？』佢哋話啲人好掛住我對黑絲！」問到平時如何保養美腿？美儀姐大方分享：「我係唔會着短褲同埋短裙，因為我好驚畀蚊咬，所以就算30幾度去行山，我都係會着長褲。」
《下流上車族》劇情笑中有淚，加上是林敏驄處男劇集作品，未開播已惹關注。根據CSM媒介研究及YOUBORA收視資料顯示，首集跨平台直播收視達23.2點，比上周同時段播映的《夢華錄》躍升5點，是翡翠台自今年四月港府放寬堂食以來，兩線劇首播最高收視的劇集。
此外，劇中一班後起之秀郭柏妍（Rosita）及羅毓儀（Yuki）亦值得關注。劇中 Rosita 經常踩滑板送外賣賺錢，為了配合角色，Rosita事前更專誠上堂學踩滑板：「以前已經心思思想學。學嗰排每日放咗工就走去練，希望將勤補拙。」Rosita 又謂與林敏驄、江美儀姐及鮑起靜私下相處也很像一家人：「有次我失咗聲好擔心影響進度，佢哋好好係咁安慰我，驄哥畀咗啲潤喉膏我食，美儀姐就推介咗啲中藥，食完之後真係好番冇事。」
Yuki 於劇中備受母親溺愛，由細到大咩都唔使做，搞到生活不能自理，常常爆出令人意想不到的笑料。Yuki受訪時大讚驄哥和美儀姐照顧後輩，其中一場喊戲 Yuki 更靠着美儀姐的「愛心雞翼」引爆淚水，相當神奇。她說：「美儀姐煮嘢食好叻，有次開廠佢整咗滷水雞翼畀我哋食，為咗喊得出我就食咗四隻，因為喊戲要用好多Energy，全部人食完之後即刻喊到一 Take收貨！」