容祖兒的《Pretty Crazy 巡迴演唱會》近日因疫情緩和，隨著多地的防疫限制解禁而得以重新啟動。相隔2年，祖兒再次踏上個人演唱會的舞台，今次一口氣去足六個地方開七場騷：馬來西亞雲頂、加拿大溫哥華、尼亞加拉瀑布城 、美國大西洋城、拉斯維加斯及雷諾，引頸以待的歌迷興奮萬分，大部分舉辦地點的演唱會門票被搶光。
首站的馬來西亞，連祖媽也跟着女兒出發，祖兒話好耐冇同媽咪去旅行，所以未上雲頂演出前，兩人一於到吉隆坡到處走走，品嚐當地美食：「諗住咁耐冇去，都未必有人認得我啦！點知最後結果係，冇人唔認得我。哈哈！我係咪好傻？」
雲頂開唱，觀眾的熱情令台上的祖兒感動萬分，最後不禁眼濕濕，她跟大家說：「終於來到馬來西亞！好開心！期待左好耐啦呢一日！有冇在場觀眾，2020年3月21號本來要來？等到今日？」全場舉手歡呼。祖兒說：「我心情真係非常興奮，等咗兩年有多，呢兩年大家有咩變化，肥咗？有咗？哈哈！我冇乜點變係咪？ 我彈琴彈來練來去個隻歌， 哈哈。我堅守住㗎，一定要彈番比大家聽。」
祖兒又謂，一個月前為巡迴開始排舞，運動修身，彈琴練歌，所有回憶都返晒來，其實疫情這些日子，每當夜欄人靜，孤單寂寞時，都是靠過去的回憶， 同自己講：「我要努力，堅持！幾年後一樣可以有一個好騷比大家睇 ！而呢個願望今日終於實現。呢一次世界最遙遠的距離令我好珍惜今次重逢，呢段漫長日子，每個人都咬實牙關渡過各人生活的難關。」她其後獻唱新歌《辛苦你了》相呼應。
由於觀眾反應太熱烈，安歌完再安歌，最後祖兒唱多三首歌才正式完場，她坦言舞台是個讓她極速叉電的地方，整個人上台後充滿力量：「我有時會覺得自己，落台後就一無是處。我真係好需要舞台，掌聲同大家鼓勵，第一場觀眾已經令我充滿力量，歡呼聲燈海感覺返晒來，重即刻有力量開始同演唱會總監馮貽柏研究新騷啦！」