【娛樂】林明禎帶媽咪坐新纜車 睇風景忘記畏高

林明禎日前帶埋媽媽一齊為昂坪360拍攝廣告，寓工作於娛樂下心情大好，不時擺Pose自拍，仲自爆係纜車迷：「今次係我第一次坐昂坪360纜車，不過如果去海外旅行，纜車係我指定嘅景點，所以一聽到話為呢度拍攝宣傳片，可以率先搭幾乎係全透明嘅車廂覺得好特別，我就話點都要接呢個Job。呢日同媽咪一齊嚟開工，佢都玩得好開心，我見媽媽都影咗好多嘅相，所以計劃遲啲帶埋家姐同細佬再嚟多次，當作係家庭旅行。」

纜車四邊同底部由全透明強化玻璃製造，明禎都話以為自己會畏高，點知佢掛住睇風景，唔記得咗驚：「搭纜車沿途有山有水，所以掛住睇風景唔記得驚，仲同媽咪喺車廂度周圍自拍！其實我自拍都有啲秘技嘅，就係影好多張相，影到自己滿意為止，再慢慢刪去唔好睇嘅照片，不過有人幫我影就更好！所以如果男仔識幫女仔影相，係會加好多分，大家記得追女仔前要先增進攝影技巧。」

聖誕節在即，明禎恨放假與家人共渡：「今年聖誕要留港工作，所以好懷念未入行之前跟家人開Party、看看燈飾的時候！我已經準備好禮物送給他們，始終我工作較忙，平常少時間陪媽媽，要好好報答她。」