無綫賀歲劇《黃金萬両》今晚年初二上演「新抱廚房」炮製開年菜，麥美恩、朱智賢（Ashley）及江嘉敏（Kaman）廚藝均非常嚇人，齊齊化身地獄廚神放笑彈，當中麥美恩煮雞變飛雞，朱智賢醋和豉油傻傻分不清，江嘉敏則炮製重口味冬瓜盅，將抹布加入湯中當花膠！
問到現實中是否同樣「地獄」，Kaman笑言：「唔可以話唔識煮嘢食嘅，開個火煮個麵都識，係睇吓叻唔叻啫！同埋上個月係我一生人煮飯次數最多嘅一次，因為屋企人唔舒服，煮飯重任交咗畀我，仲嘗試咗人生第一次煲粥，本身都好擔憂煮得唔好食，但估唔到出嚟效果係出人意料，屋企人嘅評價係好食。」Kaman還自揭下廚驚險事：「之前試過用微波爐叮鬆餅，已經搣晒所有錫紙就咁擺喺碟度去叮，點知叮到第3、4秒時，無啦啦嘭咗一聲再着火，事後都即刻換咗個微波爐，嗰排係有啲陰影！」
劇集內容除溫馨滿瀉外，三位夫人還化身「萬家女團」大跳香港本地大學流行的Dem Beat為老公打氣，神還原風靡一時的「何東Dem beat」。Ashley受訪時笑言Dem Beat場口好好玩，她說：「拍之前都好期待呢場戲，喜劇加上呢個元素感覺好得意，亦都諗番起讀大學時候嘅事，今次最搞笑係同同事做呢件事，仲要係同家燕姐喎！」
Ashley指大家拍攝前用了一天時間排練Dem Beat：「原本只係得𨂽地動作，我哋就自己設計咗啲動作配合番個口號，希望出嚟效果好睇啲。」她續指拍攝當日正值37度高溫：「拍攝時係太陽曬到正，最辛苦係曬到大家眼都擘唔開，拍嘅時候都要盡量撐開對眼。」至於Kaman同樣嗌好玩兼熱血，她說：「一路都好想試呢件事，睇片以為OK啦，但做落一啲都唔簡單，好彩我哋幾個家嫂好有默契，加上家燕姐、漪娸姐都有一齊玩，大家仲會一齊創作口號，成件事好溫馨。」
