劉佩玥（阿Moon）於明晚（20日）播出的TVB劇集《隱形戰隊》中會有性感打扮的「一樓一」造型戲份，更會大騷白滑長腿。對於長腿再成焦點，阿Moon分享美腿及保持靚腳型的心得。
無綫劇集《隱形戰隊》明晚劇情，講述劉佩玥與吳家樂為追查恐怖分子，分別「喬裝」成「一樓一鳳」及唐樓住客，近距離埋恐怖分子身進行調查，阿Moon亦因惹火「一樓一」打扮惹禍。預告所見，身穿V領性感絲質睡衣的阿Moon風騷返回單位，就在準備關門之際，其中廖家爵飾演的一名恐怖分子強行登門造訪表示要「幫襯」，大感慌張的阿Moon為力保「一樓一」身份免穿煲，情急智生下以月事作借口企圖脫身，最終當然難敵對方「霸王硬上弓」，被捉實兼遭整個人拋在床上，情況危急。
官方公開的預告片及宣傳照中，阿Moon再度大晒「逆天長腿」，除了修長度讓人羨慕，就連白滑度也備受關注，加上角色性格討喜，劇集熱播後成功入屋。問到阿Moon長腿成為劇集亮點心情，她開心感謝觀眾喜歡，更大方分享美腿兩大心得，就是適當運動及飲水：「其實我細個唔係好高，我記得我低年班時都係排前面嗰幾個，直至去到大約中四先至突然開始長高，我諗都關我鍾意運動事。因為以前有打排球，我又好鍾意跑步，所以我覺得做運動同成日飲水都會令到個腳形靚啲。」
Moon補充指，多散步也對保持「靚腳形」有幫助：「我食完飯之後都會去行吓，就算依家揸車，都會去公園或者山度行，所以我覺得適量同適當嘅運動，都會對身形有幫助。」至於何以經常拍外景接觸陽光紫外線，仍能保持白滑肌膚，Moon透露除要做好防曬，注意飲食亦很重要：「唔好成日食啲好濃味、或顏色好深嘅食物，味精唔好食咁多，同埋最緊要保持身心開朗，飲多啲水就OK㗎喇。」
談到明晚身陷險境一幕，Moon透露拍攝時其實有一定難度：「因為個廠真係好凍，同埋張床唔係真床嚟，係一嚿好硬嘅嘢上面有啲被鋪。我同我對手廖家爵對戲時，佢都好緊張，因為驚整親我。我覺得呢類戲，最緊要演員之間有溝通同信任，所以我哋最後都好順利完成。」