鄧麗欣（Stephy）日前拍攝代言的醫美品牌廣告，被問到復出歌手計劃的進度，她坦言被不少粉絲追問過，然而Stephy仍對復出日子賣關子，只表示「覺得愈嚟愈接近好嘅timing」。
Stephy與工作人員於首日拍攝即被安排隨遊艇出海，雖然當天風和日麗，但風勢非常強勁，令遊艇不斷搖晃：「嗰日真係好難忘，可能啱啱喺熱帶地方返香港，所以覺得特別凍。我條裙仲要好薄同露背，着咗好似冇着咁，好在工作人員早有準備暖包同薑茶給我。當天真的好大風，船搖得好犀利，我冇暈船浪，但我化妝師就要食暈浪丸，哈哈！」
除坐遊艇出海，一行人隨後要再駁小艇，到人煙稀少的石灘繼續拍攝，目標必須於水漲前完成。即使Stephy整天被強風猛吹，但當要面對鏡頭時，仍能專業做出導演要求的寫意、舒服效果：「其實工作人員都好辛苦，不過睇番啲片，出嚟效果好靚，條裙好飄逸，所以一切都好值得，對我嚟講亦都係一個好難忘嘅拍攝經驗。」
由歌手轉型成為演員，Stephy口中的不斷尋求突破，未知有否包括「重操故業」。自去年Stephy驚喜現身紅館擔任張敬軒個唱嘉賓，事後她坦言有重拾做歌手的感覺。問到她復出計劃進展如何？Stephy說：「因為時不時都有fans問我，究竟你幾時唱番歌，俾番個交代佢哋。呢件事我一直有擺喺心裏面，但我希望搵到一個好嘅timing，而呢個timing，我覺得愈嚟愈接近。係會實現嘅，只係我唔敢講實幾時，但呢件事，值得大家期待。」