古巨基（基仔）相隔四年再度開騷，亦是他成為人父後首個演唱會。基仔透露兒子Kuson想父子二人同台演出，甚至捱眼瞓等上台。但可惜當時觀眾開始離場，擔心與Kuson出場會惹起混亂才作罷。
基仔籌劃兩年的音樂企劃《I REALLY LOVE TO SING AROUND THEWORLD LIVE 2023》，昨晚（8日）於會展舉行，請來樂壇不少新晉歌手當嘉賓，包括張天賦、Tyson Yoshi、吳保錡、張進翹、顧定軒、張蔓莎、女團Lolly Talk、Delta T、力臻等等。基仔以一襲白色長西裝造型登場，唱出《我生》、《初初》、《任天堂流淚》、《眼睛不能沒眼淚》及《漂流教室》。
其後基仔換上藍白色造型，並邀請Delta T及力臻上台分別合唱《有少少愛》及《Çan We Try》。接着Tyson Yoshi穿上貼身白色恤衫驚喜現身，與基仔合唱《第二最愛》，已令全場歡呼。後來MC張天賦出場合唱《自我安慰》更掀起高潮，MC留在台上獻唱《記憶棉》時，現場歌迷情緒高漲瘋狂尖叫。
基仔台上分享指今次是做爸爸後首個個唱，兒子Kuson可首次欣賞自己的演唱會，特別有意義：「話說我已經好幾年冇開騷，對我來講，做爸爸後第一個演唱會。呢個都係我個仔第一次睇我演唱會，我唔知佢坐邊度。佢噚日有睇綵排，重要上舞台，後來俾佢上來跳咗兩首歌，帶返佢落去後，佢竟然話『 I’m sad，點解帶我走。』不如大家俾佢感受吓咩係演唱會聲？一齊幫我嗌下佢個名『Kuson』。」現場近萬人一齊大叫Kuson，並且拍手歡呼，基仔謂：「多謝大家，我估老婆有拍低，Kuson睇番一定覺得好得意。」
提及今次與樂壇新一代的合作企劃，基仔謂今晚請來好多新歌手，可能大家未必了解他們的名字和音樂，當中部分曾自資出唱片，並於網上自行發表歌曲的歌手，沒太多資源支持，希望大家多多留意他們的音樂：「多謝所有今晚來參與演出的每一位歌手，最近流行AI（人工智能），我都有嘗試探討。AI係咪真係可代替音樂圈，我嘗試叫AI寫歌，問AI可唔可以寫隻歌比太太同個仔，結果就出咗兩段嘢….」現場看到營幕上打出的兩段老土文字，即刻爆笑，基仔就話，「所以目前階段，我肯定AI係寫唔到歌！佢哋嘗試學人類感情，學唔學到係問號，但係現階段係一定做唔到。AI係冇可能做到人類音樂同歌聲，好似今晚係台上的新一代歌手，佢哋付出好多努力，高低起跌，咬住麵包都要做音樂，把經歷寫出來，全部都有血有肉，AI係唔可以做到。希望大家比多些支持香港每一位努力做音樂的歌手。」獲得全場掌聲。
至於Encore部分，基仔特別唱出《必殺技》、《重複犯錯》，令歌迷都唔捨得走，安歌過後不停再叫安歌，但礙於時間及場地限制關係，歌迷只得依依不捨離開。
讚仔仔跳舞比自己叻
完騷後基仔接受訪問時，坦言沒想到下台後，仔仔沒有回家，忍着眼訓都要等着迎接他 ，還嚷着要上台，觀眾希望安歌再安歌時，他曾經想過是否帶仔仔再出場，可是由於現場已開始有觀眾離開，人流太多他再升台可能會引起混亂，只得把帶仔仔上台見大家，及感受一下觀眾的歡呼威力這個機會，留待下次演唱會。基仔坦言仔仔日後有能力可以表演的話不會阻止，更大讚仔仔跳舞比自己叻。而他亦一直構思，希望用仔仔的由細到大的聲音集合mixing成為一首歌作為留念。
談到今次跟很多樂壇新一輩歌手合作，基仔直言合作時才知道有很多新人都咬着牙關去做音樂，他們當中有很多人都是獨立歌手，又或者是剛剛簽了細公司而需要更多資源幫助，所以已提議一班歌手開了一個群組互相認識，而自己亦會盡力去協助他們。
提到明年是他入行30週年，基仔說：「其實係33，我做咗3年主持及訪問之後先唱歌，所以明年睇吓公司安排，可能會再搞演唱會啦。另外，我又想再搞個企劃係同新一代作曲填詞的音樂人合作，未來都會開始忙碌番。」