近日是非不斷的候選港姐莊子璇，在社交網站透露疑因壓力，令皮膚出現紅疹要求醫。幸她能迅速消腫，今午（14日）與其餘15位候選佳麗首次以泳裝會見傳媒，她透露醫生診斷為急性過敏，或因免疫力低或壓力過大所致，坦言擔心會翻發。
《2023香港小姐競選》本月27日舉行決賽，16位候選佳麗今午於將軍澳一間酒店以泳裝亮相宣傳。一眾佳麗谷胸上陣，當中以6號胡睿涵、9號潘明璇、16號郭佩文夠「胸」狠，上圍最有睇頭。郭佩文於台上以頭髮遮蓋右胸，記者曾要求她撥開頭髮，但她未有理會。
15號的莊子璇疑受近日是非困擾，導致壓力爆煲令皮膚日前出現紅疹，要漏夜入院接受治療。至清晨5時再更新社交媒體，透露要留院觀察：「最近嘅壓力原來已經爆發咗喺身上，一直都唔留意，最辛苦嘅原來唔係比賽本身，真係要好好注意健康，遠離壓力。」
莊子璇於記者會後接受訪問，她透露留醫兩天，直言狀態受影響：「今日都幾唔滿意自己嘅狀態。啱啱上台都有啲震，食咗藥有啲暈同眼瞓。」莊子璇續謂醫生指她患上急性過敏：「佢推斷免疫力低或者壓力過大。（係咪受負面新聞影響？）新聞呢啲嘢我自己唔係好介意。」她稱接受到比賽行程，但可能身體無法承受。
問到是否曾主動要求出院以出席今日記者會，莊子璇謂已留醫兩天，又打了六、七枝針：「醫生噚日都問我要唔要繼續留醫，因為住院方便打針，會快啲好番，如果出院就轉食藥。」她續說幸好今日已消腫，但醫生向她說有少部分人會復發：「我唔希望係嗰小部分人，決賽有事就好大鑊。」
