陳奕迅（Eason）用了一個多月於北美舉行巡迴演唱會，創下首個華人歌手於北美Arena開六場演唱會的紀錄。有傳溫哥華站門票銷情未如理想，但演出當晚全場爆滿。Eason笑指曾打算取消，觀眾即刻大叫「唔好」。
完成六站演出後，Eason謂每一站也很難忘，過去巡迴演出會很趕，馬不停蹄唱完一個地方再飛到另一個地方，中間是沒有什麼休息時間，但今次去了一個月，只唱了六晚，當中他有時間好好休息聲帶，又可以感受當地城市及與不少在北美生活的舊朋友會面， 所以都幾開心：「其實我夜晚好少出街，不過日頭有時間就去睇網球賽，同朋友見吓面聚吓舊，冇諗過shopping，但竟然都買咗幾塊網球拍，係芝加哥仲迷上左一樣新運動，叫做Pickleball，唔覺意又買咗幾塊拍。」
陳奕迅多謝他的百人團隊一起到北美舉行巡唱。
未唱歌變「新歌」
講到他是華人第一位歌手於三藩市San Francisco – Chase Center演出，Eason就謙稱冇咩特別：「係咪第一個都唔係咩特別，最緊要反而係觀眾睇得開心，明我個騷講緊咩，最開心係收到唔少歌迷睇完騷啲留言， 佢哋話入場聽到好多從來冇聽過嘅歌，冇《十年》，冇《單車》。但演唱會完了發現嗰啲未聽過嘅歌都好好聽， 現在歌單之中都係我嘅『新歌』。我估佢地係接收到個騷，呢個先係令我最開心。」
網傳Eason溫哥華門票賣得不是很好，Eason於溫哥華舞台上望着全場爆滿觀眾笑謂：「好多謝你哋，之前話溫哥華啲飛係賣得最差，但係依家又唔係好覺喎！咪又滿晒，幾好嘢喎你哋！我知啦，係你哋慢，聽講你哋係慣咗買飛買得好慢，我差啲諗住咁不如取消咗佢啦！」他續笑指來到溫哥華才知道，天雨令人不想工作， 行步路都慢些。他又跟觀眾開玩笑說：「咁慢！呢次可能係我最後一次嚟啦！」觀眾大呼「唔好」，令Eason爆笑。
自爆快將出碟
因為溫哥華是北美的尾場，所以安歌時他唱了三首歌，令觀眾十分開心，又忍不住口爆出好消息，五年沒有出唱片的他向觀眾說：「我就快出碟啦！錄咗好耐啦，隻碟同《Fear and Dreams》好有關係， 好希望隻碟可以帶到力量俾大家，喺大家經歷過好多唔好嘅事、壓力同驚恐之後，可以一齊停一停，放鬆呼一口氣， 抬頭再望，原來重有路可以繼續行， 幾時出稍後會公佈。」演出完之後， Eason留於溫哥華過中秋，跟當地好朋友聚舊，他表示演唱會後唱完便未有落雨，出去享受城市氣氛，當地有好多老朋友，所以就留多兩日大家一齊過節開心，之後返到香港就要收拾心情，為十月澳門的九場演唱會做準備。
