為紀念陳百強逝世30周年，「三劍俠」陳百強、張國榮及鍾保羅第一部合作的電影《喝采》，闊別大銀幕43年後，首次以4K數碼修復版呈現，觀眾能重新感受專屬1980年的青春歲月。
《喝采》是英皇集團主席楊受成投資的首部電影，今次將歷史久遠且珍貴的電影菲林修復，可謂別具意義。楊受成表示：「1979年投資呢部電影，79年開拍、80年上映，係我第一部！我嗰時都唔識！剩係聽陳欣健講之嘛！冇後悔！覺得決定好光榮、好榮幸！」」對於當時小試牛刀，電影成績已相當驚喜，票房直逼300萬，他得意稱：「當年係全暑假最賣座嘅電影。當時好犀利㗎喇！頭先文雋先講，如果81年上映一定攞金像獎！只係因為嗰時未有金像獎。」
楊受成坦承修復《喝采》全因為男主角陳百強：「為咗紀念Danny，今日係佢死忌30年。本來我哋諗住趕到佢生忌嘅，但係趕唔切。」逾40年過去，楊受成仍對陳百強的樣貌及才華印象深刻：「Danny仔係我認為見過嘅男仔之中，最靚仔係佢同張國榮。冇得頂啦！果種靚法好自然，兩個都好有才。」
翁靜晶憶述起當年情景：「當時有鍾保羅、陳百強同張國榮，現在只剩我一個。當年喺片場我哋都嘻嘻哈哈。當年Danny大我幾歲，我只係15歲童工。海報上面嘅日落戲，導演當時得五分鐘拍攝，但我哋覺得都係小朋友唔適合（拍接吻戲），所以同導演嘈咗一輪，結果Danny最後幾分鐘都肯錫咗我額頭一啖。」
《喝采》闊別大銀幕 43 年，帶觀眾回到過去，感受 80 年代情懷及獨有魅力，不但重現舊香港面貌，及當時的流行文化包括時裝、Disco、DJ 電台和音樂等，更觸及過去熱門話題如移民升學、歌唱比賽，也是年青人追逐夢想的青春故事。
iSQUARE戲院設陳百強展覽 供影迷緬懷
除電影，英皇戲院將由2023年10月26日起於尖沙咀iSQUARE分院設「為陳百強喝采•紀念展」，供市民免費入場。展覽將戲院劃分成多個別具特色的區域，配合不同佈置，趁電影邁向43周年，讓影迷及粉絲重温經典，緬懷一代偶像陳百強，同時感受《喝采》的魅力。
《喝采》4K數碼修復版將於11月2日正式於英皇戲院上映。除正場外，更設有特典場，影迷有機會獲贈不同電影禮品。觀眾購買正場戲票一張，可獲贈《喝采》珍藏版海報，而特典場禮遇更豐富，觀眾入場時均可獲贈電影特典一份，裡面包括特別印製的限定版紀念票、《喝采》珍藏版海報及「為陳百強喝采 · 紀念展」2024年座枱月曆。