組合TWINS將於明年1月21至23及25至27日於紅磡香港體育館舉行共六場 《TWINS SPIRIT》演唱會。對於相隔九年後再於紅館合體，今次TWINS以《SPIRIT》為演唱會主題，準備重新傳遞TWINS的精神（SPIRIT）及成軍廿多年的回憶與感動。
蔡卓妍（阿Sa）及鐘欣潼（阿嬌）早前為演唱會拍攝宣傳海報，她們分別穿上不同的紅色服飾拍攝，造型性感又具活力。當拍攝二人扮互毆的搞笑動作時，阿嬌爬到阿Sa身上後，突告失去平衡，兩人尖叫倒地，工作人員馬上上前援救，幸好兩人沒有扭傷，笑作一團，慢慢爬起來。阿Sa說：「佢跌個吓真係嚇鬼死，哈哈！我想用力拉住佢都搞唔掂，因為我唔係抱住佢，佢喺我背脊，好彩我哋喺地面重有個木箱托一托，所以阿嬌都冇事。」阿嬌則說：「冇事！其實唯一係旁邊用吹風機個工作人員，佢撲過來想幫我，我又跌得太快，佢手上面枝吹風槍就撞正我頸到，個下有少少痛。」
談到今次演唱會名為《TWINS SPIRIT》，阿嬌表示：「即係Twins精神，雖然見到poster我哋喺到互毆，但係我哋個精神就係『永不放手』，所以廿年來都冇放開過對方！即係同今日影相嗰時一樣，『永不放手』，跌低一齊跌低，起身一齊起身！哈哈。 」阿Sa亦謂：「TWINS SPIRIT就係咁多年坐埋一條船，無論順景逆景都一齊，開心一齊開心，唔開心一齊唔開心。今次有咁嘅構思，係因為廿多年來我哋實在影過太多靚相啦，想影啲靚又有另類啲感覺嘅，所以就影啲好玩啲。」之前阿Sa聲帶有事，問到她是否完全康復？阿Sa笑一笑：「都有少少擔心㗎，不過我估OK嘅。」
至於演唱會今次有咩新意帶給觀眾，兩人表示今次除了舊班底外，也加入一些新班底合作，所以一定更精彩。TWINS多年來都是帶開心給大家，今次也不會例外，至於點精彩就到時睇演唱會感受，現在不能多作透露。阿嬌就話：「我估我哋會比過去演出都辛苦，因為加好多新嘢！不過好期待，辛苦得來應該係值得同好開心。」