藝人李龍基36歲未婚妻王青霞（Chris），涉逾期居留、使用虛假文書等被控6罪，申請保釋被拒絕需繼續還押大欖女懲教所，李龍基今早從廣州趕返香港，並隨即前往懲教署辦理核實身份手續探望未婚妻。等候期間，李龍基一度老淚縱橫，探訪結束後，李龍基坦言與王青霞見面時雙方都情緒激動。
李龍基昨晚接受《大千視界HK》查詢 ，表示 「對唔住🧎徵（懲）教置（署）今日給我電話要我12:00前到大㩜（欖）收梗（押）所核實身份才能探望Chris,所以我今日不會接受訪問了，直接去大㩜 （欖）」，愛妻心切的龍哥返港後直奔大欖 ，探視愛人情況。
約早上11時許，李龍基抵達大欖懲教署，他甫下車已爆喊，不時用手巾仔抹臉，隨後登記進入懲教署。李龍基受訪時坦言知道流年不利，早已攝太歲，本來打算下午4、5時回港，收到懲教署指Chris需要日用品，即急急改車票：「我有留意Chris嘅案情，我估唔到咁大鑊，我以為佢只係過期居留好小事，完全唔知佢啲證書原來係偽造，亦都未見過佢任何嘅證書……Chris平時講咩我都會信，作為未婚夫，如果我咩都唔信、乜都Check住，係好唔畀面佢，所以佢講咩我都會選擇去信佢。」李龍基再次強調未有為Chris感到太生氣，只責怪未婚妻未有與自己商量。
李龍基探望完未婚妻後離開時，稱入到去見Chris，第一時間安慰她切勿擔心，答應對方出來後定必迎娶她過門：「我同佢講唔好理外界講乜，因為我知佢係真心嘅，相信Chris經過咁大教訓，一定會變番好，有咩都會搵我商量，佢都有同我道歉，佢覺得好似累咗我，佢絕對唔係為咗錢同我一齊，嗰7層樓喺我前妻名下，所以我係冇樓，現金都唔多，Chris喺呢個情況之下都肯同我一齊，證明佢覺得我係Right man。」
對於Chris之前曾在美國訂過婚一事，李龍基表示也認識她的前度，指Chris與前度貎合神離，性格不合，力證Chris跟前男友分手後，才與他一起，絕非一腳踏兩船。
提到Chris被控6宗罪，李龍基表示勝算好微：「不過嗰張飛行證書Chris都係畀人呃，Chris係真金白銀攞錢出來學揸飛機，唔知證書係偽造。（會告對方？）佢已經潛咗水搵唔到人。」李龍基表示會為未婚妻力爭保釋，表示自己工作照常，遲些還要去日本拍戲。
對Chris被網民批為大話情人，李龍基表示仍然選擇相信女友：「我不會再深究，作為未婚夫，我相信可以改變Chris。」至於Chris曾自稱自己經優才計劃來港，李堅信女友曾申請：「我估可能疫情期間，Chris想留喺我身邊長點，才用旁門左道方法逗留香港，Chris之前拒絕過我幾次去美加開騷，我都不以為意。」他指網上有不少人針對性攻擊女友，並不排除今次有人舉報：「我不明白為甚麼這般妒忌Chris，暫時不會通知女友家人，會將案件交律師負責。（寫求情信？）會，會找圈中人寫，希望法官網開一面。」
問可有想過事件發展如斯，或因是王青霞遭人舉報？李龍基支吾道：「我亦唔排除係或唔係，好可能大家睇到、有啲小媒體或YouTuber好似羨慕、針對佢，結果發展到咁大，呢個社會有啲人比較得閒，可能寫信去入境處，唉。」至於有網民或身邊人擔心受騙，這件事是否也提醒了？李龍基則說：「沒錯，我都好多謝佢哋，有好多人都問『王青霞係咪否呃咗你七層樓？』、『你七十幾歲要守住啲錢』」、『要攞返七層樓！』，我都想再聲明，我沒送過七層樓給她，七層樓已贈前妻，因為我跟前妻離婚，我淨身而出，我乜都唔要畀晒我前妻，係我前妻、唔係我，唔係我名。」李龍基再指名下已沒有物業：「好簡單，我冇物業錢又唔多，佢都願意跟住我，唔係為我嘅錢同啲乜嘢，佢係鍾意我呢個人、呢個性格。」他又指大家性格和興趣相似，覺得她也是找到了right man。
李龍基結婚只在內地進行
李龍基認為事已至此，日後結婚也只會在內地進行，「相信佢出返嚟都只會遞解出境，都唔係問題，返大陸住喇！」問若被判監禁時會否在獄中簽紙結婚？李龍基指沒辦法，因她不是香港人，李龍基更抽了一口氣：「我應承佢，我、我一定會娶佢，我一定會同佢結婚，所以叫唔使擔心。邊度簽紙都冇問題，好大可能係喺內地簽紙。王青霞父母身在德國，或者暫時未知情，要睇佢嘅意願。」問暫時會留港探訪王青霞，他指不會暫停工作，暫時沒需要都交了給律師，有工作會繼續，但工作同時也會掛住她，若簽了約不能推工作。
直言沒有勝算因證據確鑿
問經歷咁多事仍相信王青霞？李龍基稱：「我選擇相信，亦覺得我可以改變佢。相信佢會改過，走一條更好嘅路，仲會為佢繼續申請保釋。」問到對官司勝算？李龍基直言沒有勝算，律師也指證據確鑿，但證書的確是被人呃、考了飛機牌，但收到的是假證書，希望找回資料幫她，問可會告當事人？李龍基指該人士爭很多人錢，亦已潛水、臭名遠播，也欠了王青霞很多錢：「佢係罪魁禍首。」問可覺得能很快告一段落？李龍基嘆道：「希望啦，希望法官網開一面，傷害性唔大，只係想留喺我身邊。（幫寫求情信？）絕對會，好多人都會寫，好多朋友我都感謝佢哋。（會請認識嘅保安局長鄧炳強寫？）我哋唔好牽涉到重要人物，我識鄧局長但唔係深交，唔會騷擾他。」李龍基指很多謝圈中很多朋友支持和幫手，問王青霞可會認罪？他稱是不能不認，是看求情能做到甚麼階段。