臨近年尾，多名香港特區政府主要官員都放大假，「港特」林鄭月娥亦不例外，繼去年到桂林遊山玩水後，今年一家四口齊齊到只有零下幾度的山東省濟南市遊玩，期間不忘在Facebook專頁上載相片交代行程，真係KOL都無佢咁勤力。
合照中，林鄭月娥挽著丈夫林兆波的手站在中間，兩子林節思、林約希相伴在側，幸福滿瀉。林鄭又在Facebook透露遊覽了著名嘅趵突泉、黑虎泉、大明湖等，她指「雖然無盛放荷花同滿園垂柳，但可以感受一下老舍筆下嘅『濟南的冬天』」。
林鄭月娥又話，行程另一大收穫係參觀咗珍藏極多嘅山東博物館，形容大量珍貴嘅出土文物，令人嘆為觀止。即使放大假，林鄭亦不忘自己身份，趁機向館長建議，指香港與山東博物館可以合作，令兩地人民有更豐富嘅文化生活咁話喎。
有網民質疑身在內地，又點用Facebook上網「呃LIKE」？有人建議林鄭都係用返微信朋友圈啦。
不過快樂時光過得特別快，12月29日正式復工，林鄭又要繼續「好打得」，至於她會否於返港後就「UGL案撤控」幫律政司司長鄭若驊解話，我們拭目以待。
