ViuTV今屆口罩小姐歌手鍾雨璇（O3）及演員齊釨湮（Josephine Chai）在比賽中的「騎呢」表演深得網民「歡心」，在網絡平台被形容為「拎白卡參賽者」 。參選片段中，O3身穿黑色絲襪老師造型用「天殘腳寫毛筆字」，Josephine則性感小背心造型用胸、頭及屁股打鼓。兩人除罩後接受採訪，作為七師傅徒弟，她們都異口同聲感激七師傅，支持與鼓勵兩人參選口罩小姐選舉。
對於網民對兩位的評價，O3表示：「呢個表現唔係講笑，著住絲襪真係好難用腳夾住支毛筆寫大字，真係練咗我幾百次，仲要每次練習完之後，地下周圍都係墨水，真係寫同埋抹墨水都要用好多時間同功夫，真係好想叫大家挑戰下一分鐘用口寫個『難」字再加埋用腳寫個『力』字，大家可以玩吓，挑戰下！而網民笑我係『拎白卡嘅天殘腳』，都幾得意呀！原來呢個表現可以令到大家咁開心，俾大家恥笑下都係值得嘅，起碼可以帶俾大家歡樂，香港人咁大壓力係時候放鬆吓。」
至於55歲既美魔女Josephine亦輕鬆表示：「網民講就唔擔心，如果一個精神科醫生覺得我要攞白卡，我反而驚囉！Have fun , Be foolish! 人越來越大就會有越來越多嘅『唔可能』、『唔可以』、『唔應該』, 令自己綁手綁腳冇辦法自由自在咁生活之外，亦都影響我哋周圍冇必要咁批評別人。我想俾大家知道，其實無論你幾多歲，你想做乜都係可以㗎！響不影響妨礙傷害別人嘅情況之下，自由自在咁做自己啦！」
