張繼聰（阿聰）及白只出席新片開鏡，阿聰以「愛火重燃」來比喻二人相隔六年，再合作拍攝新片的感覺。早前到日本拍攝外景時適逢女兒生日，他特登找同片的盧瀚霆（Anson Lo）為女兒拍片賀壽，更自爆撼贏MIRROR，在女兒心地位直線上升。
英皇電影《盜月者》今日（27日）於大埔舉行開鏡拜神儀式，今次是張繼聰及白只相隔六年後再次合作，二人於戲中飾演不法分子。問到再合作有何感覺，阿聰以比喻笑言：「嗰啲人結咗婚好耐，咪去一次旅行會有愛火重燃，我諗係有類似咁嘅感覺。」白只亦謂好很開心可以再合作，二人之間的話題也多了。提到該片早前於日本取景，問到可有拍攝趣事，阿聰說：「我見Edan（呂爵安）同阿Lo（盧瀚霆）成日望住我哋，問點解你哋可以咁好笑，即係成日自己兩個喺度笑。」
對於Anson Lo早前拍攝另一套電影時受傷，二人於《盜月者》有不少動作戲，問到可有擔心受傷，阿聰笑謂日日通宵令肝戰鬥力扣減：「佢哋後生就會係傷關節。我哋年紀大咗識保護自己，就唔會郁咁多，但係個肝嗰個承受程度就差啲囉。」
阿聰於月中於舉行《香港電影金像獎頒獎典禮》上輸給劉青雲，未能奪得男主角及男配角獎頂。他表示未有感到失落：「對於我嚟講我係覺得好感恩，我覺得都贏咗，贏咗好多朋友嘅支持同埋鼓勵。我覺得呢樣嘢其實已經係好好，所以都係繼續努力。」二人又互笠高帽，他指曾奪男配角獎的白只攞獎方面經驗好豐富：「咁白只哥叫我繼續做，咁我就繼續俾心機做囉！」白只亦表示阿聰是他心目中最好的演員：「有機會嘅話就要跟你學吓嘢。」
此外，阿聰日前於社交網站上載15歲兒子張瞻的背肌照，並留言謂：「終於肯跟老豆（逗）做吓Gym。」但有網民指會有礙張瞻發育，不應讓兒子健身。阿聰解釋說：「其實係做吓運動啫，又唔係操肌。大家放心，我唔係叫我個仔參加比賽或者練到好勁，只不過係鼓勵做運動。我覺得年青人幾時做運動都梗係好㗎啦！但係都真係要姿勢正確，唔好過量。咁對成長一定有幫助。」他亦笑言經過多個月的努力，終在MIRROR奪回女兒的歡心，他指女兒跟他說：「爸爸，我都係覺得你最靚仔。」他又透露在日本拍攝時撞正女兒的生日，要請Anson Lo為女兒拍祝賀片段：「我成日都幫人拍片，估唔到自己都有今日。」
