香港資深電台節目主持人阮小儀（Kitty），今日（10日）突然於直播節目中拋出震撼彈，宣佈告別商台，結束30年電台生涯。阮小儀在節目中強調，離職與身體健康無關，也並非退休，而是希望可以多一些時間陪伴家人及享受人生。不少聽眾震驚不捨，感歎是一個電台節目時代的終結。多年的拍檔森美表示支持：「呢段時間係認清自己嘅時候，要喺中年危機前搵到自己嘅人生。你完成咗小儀嘅目標，可以搵第二人生，我戥你高興！」
54歲的DJ 阮小儀今早（10日）如常主持節目《早霸王》，節目剛開始，森美已表明有重大宣佈：「我幾個月之前叫你諗定㗎喇！有啲嘢，我幫唔到你㗎喇！就係呢一刻！」小儀表示：「我講bye bye之嘛，好causal地。認真嘅。」她指自己一向予人不認真的形像，「但今次我想認真話俾大家知，今個月31號，將會係我喺商業電台嘅最後一日喇。《早霸王》我會做埋呢幾個禮拜嘅！」
森美又踢爆謂小儀最初計劃「星期一講，星期五完」，笑稱「下個禮拜你叫阿火嚟做咪得囉！」
探討人生或嘗試不同事物：「同埋都老喇」
今年剛於商台台慶中獲頒「長期服務獎30年」的小儀，笑言會拿完金牌才離開，「好似好完美咁樣」，笑道：「唔好講到我係退休呀，係咪諗住乜嘢都唔Do。我係想有新嘅計劃。」森美插嘴：「唔好喺呢個時候R撈呀」小儀大笑：「商台電台嘅效力咁大，我梗係要講啦！」森美打趣謂：「會收番個金牌㗎！」
小儀進一步談及：「我請辭時都同高層講，因為我真係突然間…今年都有好多輾轉位，想試下闖下，或者試下抖下。因為真係三十年了，做咗咁長時間嘅嘢，好似真係未試過完全停一份工作，停一個崗位，探討下自己人生，或者試下唔同嘅嘢，同埋都老喇。」
她形容今次決定是人生「第二次勇敢」，憶起首次考入商台時，「喺出面大排隊。好多同學都問我點解，我話唔知呀，我好鍾意商業電台，所以我考DJ。對我嚟講，人生嗰次大膽係好爽嘅，而家都爽㗎！」她更向森美、梁嘉琪坦言自己是商台忠實粉絲，囑兩人「你哋呀，要做番啲好節目俾我聽呀！」森美似有一刻黯然，「我都唔知答你啲乜…盡力啦！」
森美就說：「佢同我講嘅時候，都係咁上下wording。當時我都好緊張，我諗大家聽嘅時候心裡面都有一樣嘢：你健康冇事吖嘛？」小儀：「你同高層都有咁樣關心我。沒事沒事，仍然都係『健康豬，白白豬，肥嘟嘟』。沒事，唔係因為健康關係。」未來方面，小儀表示想尋找新生活，「好想自己感受一下」。
小儀笑稱：「我想講一個大膽嘅term…我裸辭㗎真係！」她指告知森美有關決定時，對方亦有關心其健康、收入等問題，森美卻當場否認：「我無擔心你！我搵幾多，你搵幾多！」隨後大笑，小儀也笑指：「我嘅係人工係你嘅百分一呀！」森美又說：「我絕對唔擔心小富婆嘅收入。我都有同佢講，我唔會挽留你，因為人有權決定自己嘅人生。唯一一樣嘢，我要做嘅啫：我係咪要搞番個騷呢？」
小儀：唔係你走先 就係我走先㗎啦
小儀表示早於約四個月前已向森美透露有意請辭，兩人隨後談了數小時。森美表示多次勸她「搵啲嘢搞下啦」，小儀當時向他說了一句話：「唔係你走先就係我走先㗎啦！」森美謂：「當時我心諗，我輸咗添！（小儀：「BB爬行大賽，我贏咗！」）點解我會輸俾佢…」梁嘉琪取笑森美常將辭職退休掛於口唇邊，「所以我知嘅時候，咦，點解唔係你（森美）嘅？」
小儀稱與森美的四小時對話中有所啟發，思考著人生如何走下去。「我希望有另一個高峰嘅，但我未知係乜。我甚至有諗過，係咪搵啲嘢讀。當年有多個機構邀請我去讀一些課程，但不少課程要花全天，係平日嘅全天，持續三個月或以上，但我唔得，我要返工喎！」
阮小儀事後亦透過社交媒體發文：「離開的確需要勇氣，我都考慮咗好耐，所以你唔駛替我可惜，亦唔駛多疑覺得有乜嘢問題發生，只係我覺得現在剛剛好。各人都有自己人生嘅時間表，節奏亦都唔一樣」。阮小儀稱自己仍會工作，但沒有透露後續的工作安排。小儀於商台最後工作日至10月31日。
阮小儀於1994年10月入職香港商業電台，先任職廣告創作部，1996年因客串《廢話小說》「阮小儀」一角獲賞識後，獲轉職為唱片騎師，與森美拍檔主持《森美變態樂園》，兩人自此合作無間，兩人30年來主持過多個電台大熱節目，包括《早霸王》、《架勢堂》、《森美變態樂園》等，廣受聽眾好評，收聽率亦相當不俗，曾幾何時，成為不少學生們的集體回憶。
