熱播中的無綫劇集《一舞傾城》，官方日前發放劇集NG花絮片，蔡潔與陳法蓉姐於露台拍攝傾偈場口，期間一隻「飛天小強」突襲，並伏在蔡潔衣袖上，陳法蓉被嚇至尖叫，蔡潔則處變不驚，僅用手輕輕彈走「飛天小強」，果然是女中豪傑。另一幕見到陳星妤的戲服，意外勾住了姚子羚的衫，瞬間變成連體嬰的兩人忍不住爆笑，同場的楊明，則很有風度地幫二人解圍。
陳法蓉受訪時透露與唐文龍是首次合作，她說：「呢套劇除咗楊明同文凱玲，所有人都是第一次合作。同文龍合作得好愉快，他是一個好特別的演員，好多嘢佢都有自己嘅諗法，大家有商有量，同埋佢有句口頭禪，就係『傳說中嘅陳法蓉』，佢話佢好多朋友都好喜歡我，好羨慕佢可以同我合作演夫妻！」法蓉姐續指劇集賣點是「情」，她說：「除咗我同一班姊妹嘅情，我同文龍嘅一段情都好重要。劇中佢坐咗廿幾年監，後生時冇得同佢好Enjoy咁拍拖，到依家咁上下年紀，佢終於放監出嚟重聚，終於唔使隔住玻璃咁探監，嗰種重逢嘅感覺係好特別。我都有同文龍講，只要將呢種情呈現到出嚟，觀眾就會好鍾意。」
讚陳法蓉主動破冰
而唐文龍則大讚陳法蓉是女神，他說：「記得第一天開工時，我在化妝間化緊妝，佢喺後面經過時好Cute咁話：『老公點呀？我哋第一次合作喎。』佢好Nice咁主動破咗冰先，令到我哋更容易互動去演啲甜蜜戲份。」提到與法蓉姐有不少親熱戲份，文龍坦言：「都有啲壓力架，始終佢都係女神，但我哋都好合拍，同埋法蓉都好快投入角色，大家可以好放心咁去發揮。」
